Годината во која девојчињата за прв пат се соочуваат со менструалниот циклус може да влијае врз ризикот од срцеви болести, мозочен удар и висок крвен притисок. Девојките кои добиле менструација пред 10-тата година или по 17-тата година се изложени на многу поголем ризик за веќе споменатите болести, отколку оние во периодот меѓу 10-тата и 17-тата година, покажува едно истражување.
- Почетокот на првиот менструален циклус, се појавува порано кај пополните девојчиња, па врската меѓу прераната менструација и срцевите болести во подоцнежни години е сосема очекувана, изјави предводникот на ова испитување д-р Декстер Канои од универзитетот во Оксфорд.
Но, неговиот тим бил изненаден кога открил дека всушност и оние девојки кои по 17 година добиваат менструација повторно се изложени на поголем ризик.
- Почетокот на циклусот е поврзан со пубертетот и почетокот на функционирањето на ендокринот, поврзан со репродукција, но зошто времето на првиот циклус е поврзан со зголемен ризик од васкуларни болести се уште не ни е познато, додаде д-р Канои.
Истражувачите проучија медицински податоци на повеќе од милион Британки, на возраст од 50 до 64 години, вклучувајќи ја репродуктивната историја и државната стапка на смртост. Во период од 11 години, речиси 250.000 жени биле хоспитализирани или починале од компликации со крвниот притисок, 73.000 развиле срцева болест и повеќе од 25.000 доживеале мозочен удар. Оние кои имале прв менструален циклус на 13 години, околу 25% од групата, имале најнизок ризик од срцеви болести.
Оние 4% кои изјавиле дека добиле прва менструација пред 10-тата година, биле изложени на 27% поголем ризик за развивање на срцеви болести. Исто така, ризикот бил зголемен и кај оние жени кои добиле менструација по 17-тата година.
Пациентките биле изложени на малку помал ризик за добивање на мозочен удар и висок крвен притисок во споредба со срцевите болести.