Човештвото во наредните три и пол децении ќе ја извојува најважната победа во борбата против ракот, кој до 2050 година ќе престане да биде смртоносна болест за луѓето помлади од 80 години, тврдат научниците од Лондонскиот универзитет.
Како што напредуваат истражувањата и лековите во борбата против ракот се наоѓаат повеќе начини за негово лечење. Научниците од Лондон веруваат дека во релативно краток рок, медицината толку многу напреднува што со ракот нема да може да се изборат само најстарите и дека веќе нема да биде толку честа болест. Професорот Дејвид Тејлор смета дека ако истражувањата продолжат да се развиваат со ова темпо, ракот веќе нема да биде смртна закана.
Во последните 20 години имаше значително намалување при смртните случаи предизвикани од рак. Ова значи дека луѓето се уште умираат од ракот, но помала е веројатноста тоа да биде смртна казна за младите луѓе. Во претходните години стапката на смртност од рак била повисока кај луѓето постари од 75 години.
Тимот на научници тврди дека дневната доза аспирин може да биде клучна во борбата против ракот, а воедно и најефикасна одбрана.
- Реално е да очекуваме дека до 2050 година, скоро сите болести поврзани со канцери кај децата и возрасните до отприлика 80 годишна возраст може да се спречат благодарение на подобрата технологија, фармација и одредени терапии, изјавил професор Џек Кјузик.
Тој апелира да се преземат подобри активности при убедување на луѓето да почнат да пијат аспирин барем една деценија во нивниот живот меѓу 50 и 65 годишна возраст. Исто така тој советува секој човек да води здрав живот, но и да откаже од некои од најштетните навики како што е пушењето.