Научниците веруваат дека тестот на кожата може да помогне во раното откривање на болестите како што се Алцхајмерова или Паркинсова. Биопсијата на кожа може да ги покаже истите абнормални протеини кои се собираат на мозочното ткиво кога доаѓа до такви нарушувања.
Моментално не постојат сигурни тестови, па може да поминат години до појавата на симптоми и поставување на дијагноза за тие болести. Научниците сакаат да го забрзаат поставувањето на дијагноза со цел порано да се почне лечењето пред да настанат неповратни оштетувања на мозокот или пропаѓање на менталните функции. Истражувачите трагаат за соодветни биомаркери во телото – молекули во крвта или знаци кои ќе покажат за присутноста на болеста.
Илдефонсо Родригез-Лева од универзитетот Сан Луис Потоси во Мексико, верува дека кожата е добар индикатор за откривање на скриени нарушувања во мозокот.
Истражувањата на личностите кои починале од Паркинсова болест покажуваат дека истите протеински наслаги кои се формираат во мозокот за време на тие болести се насобираат и во кожата. За да испитаат тие анализирале примероци од 65 доброволци од кои 12 здрави и 53 со Паркинсова, Алцхајмерова или други видови на деменција. Научниците во кожата барале собрани протеини, кои се акумулираат при овие болести. Утврдиле дека 20 личности со Алцхајмер и 16 со Паркинсова болест имале зголемени нивоа на тие протеини во кожата во однос на другите здрави личности или оние со други видови на деменција.
Сепак, истражувачите велат дека се потребни понатамошни истражувања за да се потврдат овие резултати.