Британски археолог тврди дека го пронашол загубениот гроб на египетската кралица Нефертити и тоа во самата гробница во која е пронајден Тутанкамон.
Доктор Николас Ривс, кој работи на Универзитетот од Аризона, вели дека по анализата на цртежите во гробницата на Тутанкамон лоцирана во Долината на кралевите, открил дека постои таен премин кој најверојатно води до гробот на кралицата Нефертити.
Во историјата таа е позната како сопруга на египетскиот фараон Акенатен кој владеел во 14-от век п.н.е во можеби најбогата ера на Египет. Кралицата Нефертити и нејзиниот сопруг за време на своето владеење покренале религиозна револуција во Египет со тоа што го отфрлиле многубоштвото и започнале да го обожуваат богот на сончевиот диск, Атон.
Преку анализата на гробницата на Тутанкамон, Ривс дошол до заклучок дека постојат два тајни премини. За едниот се верува дека води до складиште, додека другиот, кој е лоциран од северната страна, најверојатно ќе ги донесе археолозите до вечното почивалиште на Нефертити. Теоријата на овој британски научник ги објаснува многуте нелогичности во гробницата на Тутанкамон кои со години ја интригираат научната заедница.
На пример фараонот не е закопан на типичен начин на кој се закопувале кралевите, самата гробница повеќе наликува на типична женска гробница, отколку на машка, додека богатството што е пронајдено е второ класно и изгледа како набрзина да било оставено во гробот.