Дали некогаш сте помислиле дека еден ден, наместо со себе да влечкате пластично шишенце со вода, од вашата чанта ќе извадите балонче кое ќе ви се истопи во устата и ќе ви ја задоволи жедта? Токму тоа сега е и возможно.
Секојдневно се зборува за тоа колку е важно да се внесе доволна количина на вода во организмот, а овој феноменален изум може да ви ја олесне целата работа. Станува збор за вода која се јаде.
Специјалниот меур, кој е биоразградлив, го измислиле лондонските научници од „Skipping Rocks Lab“, а се нарекува „Ooho“. Судејќи по сè, ова е револуција во пакувањето на вода која ќе ги промени нашите навики.
Водениот меур, кој по малку личи на силиконски инплант, се прави така што замрзнатата вода се „капсулира“ во повеќеслојна мембрана изградена од калциум хлорид и кафеави алги.
Процесот се базира на кулинарски техники на сферификација, што всушност претставува обликување на течни состојки во кулинарството, како би се зачувале обликот и текстурата на течноста во јадењата.
Сè уште не може да се каже дали ова е идеалното пакување за вода, бидејќи не може едноставно да го ставите во чантата без грижи, но Ooho има голем потенцијал да го испрати пластичното шишенце во историјата.
Само во САД, на годишно ниво се исфрлаат 50 милијарди пластични шишиња, што е значителен еколошки фактор. Доколку новиот воден меур, кој е биоразградлив, дојде на сцена, таа слика сигурно би се променила, што би било одлично за зачувувањето на животната средина.
Овој воден меур е органски и може да се изеде, но не мора доколку таа идеја не ви се допаѓа. Можете едноставно да ја испиете водата од него и да го фрлите остатокот.