Научниците од University of California, San Francisco (UCSF) и Vanderbilt University развиле вештачки бубрег кој користи силиконски нанофилтер за да ги отстрани токсините, солите и водата од крвта кај пациентите со хронична болест на бубрезите на кои им е потребна секојдневна дијализа.
Сега засега во фаза на прототип, овој уред успеал комплетно да ја имитира функцијата на човечкиот бубрег, а за негово функционирање не е потребна никаква пумпа или батерија/електрична енергија, туку работи исклучиво со помош на крвниот притисок на пациентот. Се вградува близу бубрезите ( кои што нема да треба да се вадат), и се поврзува директно со бешиката и околните крвни садови. На тој начин би работел 24/7 и би ја елиминирал потребата од класичната дијализа.
Двете главни негови компоненти се хемофилтерот, кој користи мембрана за филтрирање изработена со силиконска нанотехнологија, како и биореактор кој ја реабсорбира солта и водата притоа не реабсорбирајќи ги и токсините. При овој процес не се нарушува биолошката активност како што е авторегулацијата на крвниот притисок и произведувањето на витаминот D.
Овој проект е веќе селектиран од US Food and Drug Administration (FDA) за да влезе во програма наменета да го забрза развојот на медицински уреди со потенцијал да се борат против животно загрозувачки или неизлечиви болести, а целта е веќе во оваа декада да се појави на комерцијалниот пазар.