За првпат во историјата научници успеале да снимат фотографии на единечни протеини, благодарејќи на материјалот графен (graphene), кој е ултра-тенок карбон.
Досегашните модерни техники за микроскопско фотографирање ( како X-Ray crystallography или cryo-electron microscopy ) имаат потенцијал да ги уништуваат деликатните (протеински) молекули, бидејќи осветлување на мноштво молекули со рендгенски зраци или високо-енергетски електрони го оштетуваат протеинот. Доколку некој дел е оштетен, тој нема да се прикаже на фотографијата. Друг проблем е што молекулите се постојано во движење, што го отежнува целиот процес на нивно фотографирање.
Тим на истражувачи од University of Zurich на чело со Jean-Nicolas Longchamp откриле нов начин кој ги држи молекулите „мирни“.
Процесот почнува со прскање на раствор од протеини врз тенок лист графен, кој ги фиксира молекулите во место. Листот/слајдот потоа се поставува под електронски холографски микроскоп, кој користи електронски бранови за да создаде слика, а бидејќи овие електрони се со ниска енергија, не го оштетуваат протеинот.
На овој начин тие успеале да фотографираат единечни протеини (со големина од неколку нанометри) што со ниедна друга традиционална техника не би било возможно. Како што може да се види и од сликата, добиените резултати се скоро идентични со моделите на молекули произлезени од досегашните истражувања.
Во иднина, со овој метод ќе може да се разгледува разликата во структурата на молекулите кај здрава личност и некој со болест предизвикана од дисфункционални протеини, како што е Алцхајмеровата, што ќе придонесе за многу поголеми шанси за навремено забележување и третирање на болестите од овој тип.