Научниците од HRL Laboratories од Малибу успеале да ги реплицираат карактеристиките и реакциите на човечките мускули, во нов вид на метал.
Човечките мускули се способни да се адаптираат на ситуациите во кои што се користат – се стврднуваат кога вршиме тешка физичка работа, или пак се релаксираат/омекнуваат кога работиме нешто деликатно, како на пример сликање/цртање. Овие карактеристики, барем досега, било тешко да се реплицираат во механичките системи, поради нивната комплицираност но и висока цена.
Научниците од HRL Laboratories создале технологија наречена „variable stiffness vibration isolator” (изолатор на променлива вибрација на вкочанетост) , која е способна состојбата на металот да ја промени од комплетно вкочанета во мека, со притисок на едно копче.
Каде оваа технологија би имала примена? Структурите направени од цврст материјал (како роботските раце во автоматизираните фабрики или амортизерите на камионите) се способни да издржат огромни товари, но доколку нешто им ја измрда базата/основата, целата структура станува нестабилна. Од друга страна пак, структурите направени од меки материјали се стабилни при потреси/измрдувања, меѓутоа не се способни да издржат поголем товар. Со помош на оваа технологија, би можеле да се изработуваат машини кои не само што би биле стабилни и флексибилни, туку и би издржувале големи товари.
Научниците веруваат дека технологијата ќе биде доволно ефтина за масовна изработка, и дека би имала огромна примена во роботиката (за изработка на роботски екстремитети кои ќе имаат карактеристики на човечките мускули), но и во автомобилската индустрија (за изработка на системи за амортизација со кои воопшто нема ни да се осеќаат дупките и испакнатините на патот).