Во малите, лепливи зрнца хмељ се наоѓа ензим ксантохумол, новооткриена состојка, за која германските стручњаци од Технолошкиот универзитет во Минхен, тврдат дека е исклучиво благотворна по здравјето. По истражувањето тие заклучиле дека е појак антиоксиданс од витаминот Е, со изразени анти-канцерогени својства. Моментално се вршат додатни испитувања за дејството на темното пиво врз малигни клетки, бидејќи овој ензим е во поголеми количини кај темното отколку кај светлото пиво.
- Ксантохумолот му помага на организмот да се ослободи од канцерогени материи, а функционира на тој начин што му смета на делувањето на цитохромот Р-4, кој може да го активира канцерогениот процес. Истовремено, помага при намалување на канцерогените материи, стопирајќи го растењето на туморот во рана фаза. Пивото, особено темното, наскоро би можело да стане и лек, а не само задоволство, истакна д-р Вернер Бек, стручњак за технолошкиот состав на пивата.
Со ова се согласуваат и научниците од американскиот Национален институт за здравје. Тие тврдат дека во умерени количини се намалува ризикот од тромб, бидејќи се намалува лошиот холестерол (LDL) и се зголемува добриот (HDL). Содржи и бета глукани, растворливи влакна кои го штитат срцето. Исто така, добар извор е на витамини B6 и B12, како и фолна киселина.