Во иднината, научниците можеби ќе бидат во состојба да ја менуваат бојата на кожата и косата на луѓето, благодарејќи на најновата студија за матични клетки со која е лоциран механизмот кој ги контролира нивните бои.
Студијата е направена од научници од NYU Langone Medical Center и објаснува како контролата на клетките на кожата и косата (т.е на меланоцитните матични клетки) е регулирана од сигнални реакции кои одат од клетка на клетка.
Овие реакции се дел од Type B рецепторот на ендотелин (EdnrB) (Eндотелин е пептид одговорен за стегање на крвните садови и крвниот притисок), и на сигналните патеки на Wnt (направени од протеини кои ги спроведуваат сигналите во клетките низ рецептори на површината на клетката).
Со стимулирање на EdnrB патеките, повредената кожа кај белите глувци станувала темна при заздравувањето, а со блокирање на Wnt сигнализирањето и стопирање на меланоцитните матични клетки да се развиваат во меланоцити со нормална функција, глувците развиле непигментирано сивкасто крзно.
Овие резултати покажале дека EdnrB сигнализирањето игра критична улога во растењето и регенерацијата на одредени пигментирани клетки на кожата и косата и дека овие патеки се зависни од функционирањето на Wnt патеките.
Доколку се таргетира механизмот кој ја контролира бојата на кожата, научниците веруваат дека техникава може да се искористи да се репигментираат клетките оштетени од витилиго (болест карактеристична по губитокот на пигментацијата на кожата, од која боледувал и Мајкл Џексон).
Истата техника би се користела и за пребојување на белите влакна на косата, како и за корегирање на дисколорацијата која се создава околу раните на кожата.