Истражувачи од University of Rochester во САД измислиле метал кој е супер-хидрофобичен и сам се чисти.
Сите хидрофобични материјали кои се појавиле (било да се работи за цврсти материјали или некој вид на облека) досега всушност самите го немаат својството да ја одбиваат водата, туку се обични материјали испрскани со заштитен хидрофобичен слој, кој со тек на време се троши и го снемува, со што материјалот го губи тоа својство.
Новиот метал ги има хидрофобичните својства вградено во него, така што засекогаш ќе остане ефективен. За да се создаде овој материјал, легура направена од платина, месинг и титаниум била „пукана“ со ултра брзи изливи на ласерска светлина, од кои секој траел по една фемтосекунда (неколку квадрилионити делови од секунда – за споредба, односот на фемтосекунда спрема секунда е колку што е на секунда спрема 32 милиони години). Ова ја сменило структурата на металот така што создало минијатурни дупки, глобули и резби врз неговата површина, а нивната распореденост и количина определуваат колку многу или малку молекулите на течноста ќе реагираат при допир со неа. Така, металот може да се направи при контакт со течноста да ја разнесува рамномерно врз површината (нормално, без да ја впие па дури со процесот на изработка може и да се контролира правецот во кој ќе тече), или пак капките во допир со него веднаш да се одбиваат.
Металот е црн, што го прави исклучително корисен во уреди каде што е потребно собирање на светлина, како што се разни сензори или соларни панели. Покрај тоа, тој самиот се чисти, со антикорозивни и антимикробски својства и не се заледува. Тоа значи дека би можел да се користи за изработка на клима уреди или фрижидери кои никогаш нема да акумулираат лед, за полици на кои нема да се зафаќа прашина и за разни површини каде што никогаш нема да можат да опстанат штетни микроби.
Оваа инвенција ги заинтересирала и фондацијата на Бил и Мелинда Гејтс, поради потенцијалот да се користи за лесно собирање на вода од дождовите во сиромашните земји ширум светот.
За жал, за користењето на овој тип на метал во комерцијални цели ќе мора да се почека додека целиот процес значително не се усоврши, бидејќи моментално за да се изработи парче од 2,5 x 2,5см е потребен еден час.