Развитокот во индустријата за производство на автомобилски гуми моментално е фокусиран на минимизирање на триењето помеѓу автомобилот и патот. Клучниот момент кај концептите како што е Hyperloop, каде што се работи за движење со исклучително големи брзини, е елиминирањето на триењето при транспортот, што ќе биде инспирација, а најверојатно и одлика на сите нови копнени транспортни методи кои ќе се развиваат во иднина.
Бразилски и aнглиски истражувачи успеале да левитираат цврста полистиренска топка користејќи акустични бранови. Иако овие бранови и досега биле користени за вакви цели, тие имале ограничувања – големината на објектите кои се левитирале морала да биде најмногу четвртина од брановата должина на акустичниот бран.
Исто така, ова е прв сферичен објект кој успеал да левитира акустично, бидејќи претходните објекти биле во форма на жица или рамни.
За типот на брановите кои истражувачите ги користеле, поточно ултразвучни со фреквенција над 20 kHz, максималната големина на објектот би требала да биде 4mm. Меѓутоа, во студијата се открило дека со комбинирање на повеќе ултрасонични трансдуцери, кои тие ги поставиле во форма на трипод, можеле да се левитираат објекти многу поголеми од акустичната бранова должина. Левитирањето било постигнато така што трите трансдуцери произведувале статичен бран во просторот помеѓу нив и топката.
Акустичната левитација има примена во справување и манипулирање со разни материјали, како што се исклучително врели или пак течни материјали во вселената. Во микрогравитацијата, течните капки имаат поголема големина отколку на Земјата, а акустичната левитација може да се користи за нивна контрола и анализа.