Нов материјал способен да генерира електрицитет од сончева светлина и движење, ќе може да се користи за напојување на вашиот смартфон или смарт часовник додека се движите на отворено.
Истражувачите го направиле овој текстил со ткаење на влакна од пластични соларни ќелии и генератори кои создаваат електрицитет кога се тријат едни од други.
Тие велат дека ткаенината е со дебелина од 0.32mm и е лесна, флексибилна, пропустлива, и за нејзина изработка се употребени ефтини материјали. Таа може да биде интегрирана во облеки, завеси, шатори и сл. , претворајќи ги во енергетски извори кога се изложени на сончева светлина.
За создавање на енергија од движење е „задолжен“ феноменот наречен трибоелектричен ефект – тоа е кога два различни материјали постојано се допираат, и едниот ги собира електроните од другиот при што се создаваат спротивни електрични полнења помеѓу двете површини.
Во новиот хибриден текстил, како трибоелектрични генератори се користат тенки нишки од бакар премачкани со полимер сличен на Тефлонот, додека соларните ќелии се направени со спојување на цинк-оксидни наножици осетливи на светлина со пластични жици обложени со бакар и манган. Потоа, кога текстилот се превиткува, бакарните нишки се тријат од Тефлонските и се генерира електрицитет.
Иако сè уште текстилот не е тестиран на подолг период, истражувачите велат дека производството на електрицитет не опаѓа ни по 500 превиткувања.