Алкохолот, иако е уживан од многумина, предизвикува полно здравствени ризици и компликации, а глобално неговата злоупотреба е 5-ти по ред водечки фактор за предвремена смрт и попреченост.
Дејвид Нат, професор од Imperial колеџот во Лондон, тврди дека е на добар пат да го реши овој проблем со синтетизирање на Алкосинт – пијалак кој не предизвикува мамурлак, т.е сува уста, гадење, и главоболка, а ги предизвикува истите ефекти во мозокот како и „обичниот“ алкохол. Формулата е патентирана тајна, а професорот тврди дека во оваа негова верзија, една од активните состојки не е дериватив на бензодиазепин (седатив и релаксант), кој го содржеле некои од претходните формули.
Нат вели дека Алкосинтот не го оштетува црниот дроб и срцето, и очекува истиот да го револуционизира јавното здравство и да го замени конвенционалниот алкохол.
Додека кај обичниот алкохол не може да се контролира степенот на пијанство кое ќе го предизвика кај некого, формулата на Алкосинт може да се адаптира за постигнување на максимален ефект, поточно одредена точка на пијанство.
Како и да е, макар и тврдењата на професорот да се 100% точни (што допрва треба да се испита), важно е да се запомни дека Алкосинтот нема да ги сопре останатите начини на кои што пијанството е опасно – возење во таква состојба, лошо расудување, агресија и сл.