3D принтањето е навлезено во скоро секоја индустрија, вклучувајќи ја и онаа за козметика и убавина – од машини за 3D принтани нокти, до пенкала за 3D принтана шминка со боја идентична како вашата кожа, па и 3D принтани перики и инпланти за коса.
Компанијата L’Oreal објави дека и самата ќе почне со 3D биопринтање на фоликули за коса, во партнерство со француската компанија Poietis, која развива технологија за ласерско принтање на клеточни структури.
Процесот започнува со мапирање на локациите каде што новите клетки треба да растат, за да потоа дигитално се креира клеточна структура и начинот на кој што биоматеријалите ќе растат по имплантирањето. Откако ќе се креира био-мастило од посакуваните клетки, започнува принтањето со пулсирачки ласер кој се одбива од огледало, низ сочиво, па низ трака преку која био-мастилото се внесува со брзина од 10 000 микро-капки во секунда. Откога ќе се креира, ткивото треба да созрее пред фоликулите да почнат да растат.
Poietis веќе имаат искуство со креирање на ‘рскавица 1cm широка и 0.5mm дебела за која биле потребни 10 минути да се произведе, а очекуваат дека поради комплексноста, за изработка на фоликулите ќе треба повеќе време.
Овој проект на L’Oreal ќе се искористи за помагање и на истражувањата поврзани со губењето на косата, нејзиното стареење и растење, а фоликулите имаат потенцијал и да го „излечат“ губењето на коса.