Потрагата на човештвото по вонземски живот секогаш била базирана на нашето сопствено искуство со живите форми, барајќи светови со слични карактеристики какви што ги има Земјата. Но, Сет Шоштак, кој е астроном од SETI, верува дека тоа ја ограничува нашата потрага по интелигентен живот во универзумот.
Тој вели дека потрагата треба да ја прошириме да вклучува и самосвесни вонземски машини, бидејќи додека ние ги детектираме и имаме интеракција со нив, тие веќе би имале создадено развиени технологии како вештачката интелигенција (AI).
За да ја сфатиме неговата поента, треба да погледнеме во сопствените технолошки достигнувања.
Технологијата постојано се развива, и многумина сметаат дека развивање на супер интелигентна AI машина не е прашање дали, туку кога ќе се случи. Според него, кога веќе сме можеле да развиеме AI неколку стотици години по измислувањето на радиото, зошто тогаш вонземјани кои се развивале којзнае колку илјадници или милиони години не би можеле да го сторат истото.
Доколку вонземјаните навистина се „отарасиле„ од нивните биолошки тела и превземале дигитални форми, тогаш треба да ги бараме во региони “привлечни“ за дигиталните форми на живот – како што се енергетски богатите центри на галаксии, или региони каде што се наоѓаат многу минерали.
Токму поради ова напорите кои ги вложуваат здруженија како SETI (Search for Extraterrestrial Intelligence) се со исклучително значење – тие не бараат само светови на кои би бил можен живот, туку било какви (можеби за нас непојмливи) сигнали за постоење на секаков тип на живот во универзумот.