Стартап компанијата MycoWorks користи габи за изработка на материјал кој е замена за кожата, преку процес кој не само што е брз туку е и евтин.
Фил Рос, главниот техничар од MycoWorks, собирал и растел печурки уште од 1980-тите. За тој период, тој открил многу можности кои произлегувале со манипулирање на условите за растење на мицелиумот на печурките – тоа се влакната слични на пајакова мрежа кои се шират низ почвата или ѓубрето и од нив ги собираат хранливите материи.
Печурките биле растени и хранети со агрикултурен отпад како струготини или пченкарни кочани, а за време на нивниот развиток биле менувани условите како влажноста на воздухот, експонираноста на светлина и температурата, со што тие се „прелажувале“ да растат на различни начини, со различни текстури и варирачка издржливост. Дури бил развиен и материјал доволно цврст да се користи како столче.
Компанијата моментално користи Ganoderma lucidium, позната и како реиши печурка, која често се користи во азиските природни лекови и чаеви и која е докажано безбедна за јадење, но и за аплицирање врз човечката кожа.
За, на пример, кравјата кожа да „стаса“ т.е доволно да созрее за да може да се култивира, потребни се околу 2 години, додека на оваа од печурки потребни и се само 2 недели. Во поглед на ресурсите, таа исто така не бара многу, во однос на просторот, храната и сè останато што е потребно за производство на кожа од животни.
Од компанијата се надеваат дека овој материјал ќе почнат да го употребуваат и останатите индустрии и дека во иднина ќе биде адаптиран не само за производство на вештачка кожа, туку и за материјали кои би биле замена за дрвото и пластиката.