Секоја година, повеќе од 100 000 луѓе ширум светот умираат од каснување од отровна змија. Од змии се каснати околу 4.5 милиони луѓе, од кои скоро 3 милиони имаат посериозни последици од повредата, како што е ампутацијата.
Бидејќи отровот содржи мноштво различни токсини кај секоја врста на отровна змија, од исклучителна важност е правилен противотров да биде даден на жртвата на време. Ова е особено тешко во деловите на светот поради разни причини – недостапност или далечина на локацијата каде што се случил инцидентот, недостаток од фрижидери за складирање, како и високата цена на производство на конвенционалните противотрови.
Тим хемичари од Универзитетот во Калифорнија, Ирвин, кои веќе имале дизајнирано наночестички кои се поврзуваат со токсинот во отровот од пчелите и го отстрануваат од крвта, сега ја искористиле технологијата како почетна точка во борба против змијскиот отров. Но овој пат, наместо да се поврзат со еден вид на токсин, тие создале наночестички кои потенцијално можат да отстранат повеќе токсини истовремено, како и да се борат против отровот од повеќе врсти на змии.
Истражувачите ја таргетирале специфичната група на токсини наречена PLA2 протеини, за што биле создадени честички со разни хемиски функции кои биле аранжирани во разни конфигурации и инкубирани во разни PLA2 протеини. Оние кои најдобро се врзувале со протеините биле користени како основа за наредните рунди на инкубација. На овој начин се развиле наночестички кои можат да се користат врз мноштво штетни протеини.
Потребни се понатамошни тестирања дали наночестичките ќе функционираат како што треба, а доколку резултатите се успешни, тоа значи дека на пазарот ќе биде достапен многу поефтин противотров кој нема да има потреба да се чува во фрижидери.