Научниот свет периодов дискутира околу возможното „воскреснување„ на влакнестиот мамут, а др. Мичио Каку, професор по теоретска физика од градскиот колеџ во Њујорк се прашува што би се случило доколку би клонирале неандерталец или диносауруси, базирано само врз нивните геноми.
Џорџ Чурч, генетичар и директор на Чурч лабораторијата на универзитетот во Харвард, верува дека клонирање на неандерталец е возможно, и дека за тоа би била потребна жена која би била сурогат. Со денешната технологија за матични клетки и комплетираната секвенца на неандерталскиот геном, потенцијалот за клон е возможен.
Неандерталците изумреле пред десетици илјади години, и клонирање на еден таков и покрај привидната „леснотија“ со која што тоа би се извело би бил огромен подвиг, но што е со диносаурусите кои живееле пред 65 милиони години? Др. Каку признава дека клонирање на диносаурус не би било воопшто лесно, што не значи и дека е невозможно.
Тој вели дека протеините пронајдени во меките ткива од коските на диносаурусите се слични како оние на кокошките, жабите и рептилите, што ја потврдува теоријата за нивната меѓусебна поврзаност. Според него, со користење на суперкомпјутери, би можела да се создаде генетската секвенца која би креирала теоретски потенцијал за клонирање преку епигенетика (проучување на промени во организмот предизвикани од промена на генетската експресија, а не од промена на самиот генетски код)
Кога станува збор за клонирање на мамути или диносауруси, ограничувањата се во главнотехнички. Кај неандерталците, пак, постои додатен елемент: етика. Др. Каку се прашува што би се случило откога би се родило дете-неандерталец? Дали би се држело во заробеништво како некој вид на животно во зоолошка градина? Дали цел живот би се проучувало? Што ако неандерталците се природно агресивни – дали во тој случај детето постојано би требало да е под дејство на лекови или да му е ограничено движењето? Дел биоетичари сметаат дека генетската разновидност би била позитивна за човечкиот род, додека други сметаат дека самиот чин на клонирање на неандерталец е премногу нехуман дури и како (потенцијално неуспешен) обид.