Ако мислите дека времето на нашата планета понекогаш е многу лошо, замислeте какво е на ледените џинови Нептун и Уран, каде интензивните притисоци и супер-топлите температури предизвикуваат врнежи од дијаманти. Сега, научниците успеале тој ефект да го рекреираат тука на Земјата.
Со помош на исклучително моќни оптички ласери со кои брзо се загревал полистирен, истражувачите успеале да создадат и да го студираат овој „дијамантски дожд“ во лабораторијата, што би ни помогнало подобро да ги разбереме условите на другите планети слични на Нептун или Уран.
Претходно, истражувачите можеле само да претпоставуваат како дијамантскиот дожд се формирал, а сега тоа е потврдено со овој експеримент.
Научниците сметаат дека на Нептун и Уран интензивните притисоци го формираат водородот и јаглеродот од планетата во дијаманти, а тој процес се случува на околу 8050км под површината на планетата.
На овие планети нема полистирен, но тоа е хемикалија која ги заменува состојките формирани од метан, кои ги има во огромни количини на овие две планети.
За да го рекреираат ефектот, научниците креирале два ударни бранови во полистиренската пластика, користејќи инструмент наречен Matter in Extreme Conditions (материја во екстремни услови) за да генерираат огромна топлина.
Кога двата брана се сретнале, креирале температури околу 4727 °C и притисоци од околу 150 GPa (скоро половина од притисокот во јадрото на Земјата) – слично на условите кои постојат на Нептун и Уран.
Една од мистериите кои овој дијамантски дожд ги објаснува е зошто ледените џиновски планети се способни да генерираат повеќе топлина отколку што е очекувано. Причината за тоа е што дијамантите поради тоа што се потешки од околината, тонат во неа, при што се создава триење кое генерира топлина.
Истражувачите се надеваат дека оваа студија ќе помогне во производството на дијаманти на Земјата – поточно, вештачките дијаманти кои сега се креираат со помош на експлозиви, би можеле многу поефикасно да се креираат со ласери, доколку ова истражување и понатаму се развива.