Тим истражувачи од MIT развиле нов вид на батерија која „дише воздух“ која може да складира енергија со месеци по една петтина од цената потребна за тоа со сегашните технологии.
Таа функционира со „инхалирање“ на надворешниот воздух додека се празни, а се полни кога „издишува“ кислород.
Според нејзините креатори, батеријата буквално вдишува и издишува воздух, но не издишува јаглерод диоксид како луѓето, туку кислород и со внесувањето и исфрлањето на кислород од системот креира баланс во напонот.
Катодата и анодата на оваа батерија се всушност течности кои преку размена на јони складираат и испуштаат енергија. Анолитот е мешавина од вода и сулфур, додека католитот е оксидирана мешавина од течна сол, која на батеријата и овозможува да го „издишува“ воздухот. Кога воздухот се „вдишува“ се креираат негативно напојувани хидроксидни јони во католитот, а кога се издишува електроните се враќаат во анолитот и се креираат водородни јони.
Литиум-воздушните батерии кои имаат иста енергетска густина функционираат на ист начин – но сулфурот, солта и водата се значително поевтини. Намалувањето на трошоците е од суштинско значење за развој на системи за складирање на енергија која потоа може да се адаптира за користење во енергетската мрежа.
Тимот истражувачи смета дека верзија од нивната батерија произведена во вистинска големина (прототипот е голем колку обична шолја кафе) би чинела $20 до $30 по киловат час (kWh), а колку за споредба останатите системи кои сега се користат чинат околу $100 по kWh.