Нов флексибилен материјал развиен од истражувачите од ЕМПА, (Швајцарски федерални лаборатории за наука и технологија на материјалите) генерира електрицитет кога е компресиран и растегнат.
Ваков материјал е возможен благодарение на пизоелектричниот ефект, кој го употребуваат аналогните грамофони. Тие ја свират музиката преку игла која ги чита нерамнините на плочата и притоа механички вибрира.
Преку пизоелектричниот ефект, овие вибрации се конвертираат во електрични импулси кои генерираат звучни бранови, а таа конверзија на механичкото движење во електрична енергија се случува и кај материјалот креиран од истражувачите од Емпа.
Претходно, овој ефект бил забележан само кај кристалите, а Дорина Оприс и нејзините колеги докажале дека неговите карактеристики можат да постојат и кај еластичните материјали.
За жал, овој нов материјал не е воопшто лесно да се произведе. Прво, поларните наночестички и силиконот мора детално да се оформат пред да се поврзат. Потоа во тенкиот еластичен филм се пушта силно електрично поле кое го креира пизоелектричниот ефект.
Поради неговата тенка, флексибилна и органска природа, ваквиот материјал би функционирал многу подобро во човечкото тело отколку гломазната електроника и би бил идеален за изработка на сензори чувствителни на притисок, песмејкери и останати медицински уреди. Тенкиот филм би можел да се користи и во облеките кои би генерирале електрицитет од самото движење на оној кој ги носи.