Голема пукнатина која се протега неколку километри се појавила на југозападна Кенија, која предизвикала колапс на дел од автопатот Најроби-Нарок и била пропратена со сеизмичка активност во таа област.
Земјата е планета која постојано се менува, а тектониката на плочите е добар пример за ова.
Земјината литосфера е поделена на неколку тектонски плочи кои не се статични, туку се движат со различни брзини врз вискозната астеносфера (која се наоѓа меѓу 100 и 200km. под површината, и е слабата или „мека“ зона во горниот плашт)
Точно кои механизми се причината за овие движења сè уште е предмет на дебати, но најверојатно вклучуваат струи во рамките на астеносферата и силите генерирани на границите меѓу плочите.
Овие сили не само што ги движат плочите, туку предизвикуваат и нивно пукање и создавање расцепи што потенцијално може да води до креирање на нови граници на плочите.
Источно африканскиот систем на расцепи е пример каде што ова моментално се случува – тој се протега над 3000км. од заливот Аден кон Зимбабве, делејќи ја африканската плоча на два нееднакви дела – Сомалиска и Нубијска плоча.
Расцепите се почетната фаза на кршењето на континенталните плочи и доколку тоа е успешно може да води до формирање на нов океански слив.
Сите овие фрактури не се формираат истовремено – африканската секвенца започнала во регионот Афар во Етиопија пред околу 30 милиони години, и се движелa кон Зимбабве со брзина од 2.5 – 5cm годишно
Источно африканскиот расцеп е уникатен бидејќи ни овозможува да ги набљудуваме различните фази на расцепување (рифтинг) по неговата должина.
На југ, каде расцепот е млад, тоа се случува во поголема област каде сеизмичката активност и вулканската активност се ограничени. Кон регионот Афар, пак, подот на целата долина е покриен со вулкански карпи.
Тоа сугерира дека во оваа област литосферата е толку истенчена да се наоѓа пред кршење. Кога тоа ќе се случи, ќе се формира нов океан во просторот помеѓу скршените плочи, а во период од неколку десетици милиони години неговата површина ќе се зголемува по должината на расцепот.
Како резултат на сето ова, африканскиот континент ќе станува се помалечок и ќе биде поделен на два дела.