Освен нуклеарната енергија, сите останати енергетски извори директно или индиректно се зависни од Сонцето. Истражувачите со години се обидуваат да добијат што повеќе енергија од нашата ѕвезда, а многу истражувачки тимови досега се обидувале да креираат гориво од сончева светлина.
Сега, еден таков тим од универзитетот Кембриџ успеал од лисја да креира гориво и тоа со имитирање на фотосинтеза.
Иако вештачката фотосинтеза се прави веќе со декади, методата користена во најновава студија е еден вид на полу-вештачка фотосинтеза, каде биолошките и неоргански системи функционираат заедно. Оваа метода користи ензими за да се постигне реакцијата и е способна да апсорбира многу повеќе сончева светлина отколку природната фотосинтеза.
Природната синтеза не е премногу ефикасна бидејќи е еволуирана колку билките да преживеат, што значи дека се креира минимална количина енергија потребна за тоа – околу 1-2% од она што билката потенцијално би можела да конвертира и складира.
Тимот истражувачи користел природен процес кој го има во алгите – тие имаат ензим наречен хидрогеназа која може да ја разделува водата, процес кој веќе не им е потребен да опстанат но е корисен за нас. Истражувачите успешно успеале да ја искористат хидрогеназата со фотосинтетички систем со што постигнале полу-вештачка фотосинтеза напојувана исклучиво од соларна енергија.
Многу групи се дистанцираат од вештачката фотосинтеза поради нејзината преголема цена и фактот што продуктите потребни да се направат хемиските реакции ефикасни често пати се токсични. Полу-вештачките решенија како оваа нова техника нудат побезбеден и потенцијално поевтин начин да се градат системи за конвертирање на соларна енергија во иднината.