Со комбинирање на математика со 3D принтање, истражувачите од Бостонскиот универзитет креирале нов материјал кој навидум пркоси на логиката – низ него поминуваат светлината и воздухот, но не и звукот.
Изработката на овој „акустичен метаматеријал“ започнала со пресметување на димензиите и спецификациите кои еден материјал би требало да ги има за да е способен да ги рефлектира звучните бранови назад кон нивниот извор, без притоа да ги блокира воздухот и светлината.
Потоа, ваквиот материјал бил 3D испринтан во форма на американска крофна и бил прицврстен на едниот крај од PVC цевка, додека на другиот крај имало звучник.
Кога од звучникот бил пуштен звук, формата блокирала 94% од него.
Ваквиот акустичен метаматеријал би имал разновидна примена и не е ограничен на формата која била употребена во тестирањата. На пример, тој би можел да се изработи во форма на цигла од која би се изградил ѕид кој не пропушта звук, но пропушта светлина и воздух.
Материјалот би можел да се искористи и за намалување на звукот кој го испуштаат дроновите, па дури и MRI машините.