Мразот постои во многу различни форми, иако ние вообичаено имаме контакт само со едната негова форма. Научниците се запознаени со околу 20 различни молекуларни видови на мраз – некои се езотерични и ретки, некои постојат само во компјутерски симулации, а некои пак само на далечни планети.
Во нов експеримент, научниците успеале да креираат вода која никогаш не замрзнува, дури и на температури блиску до апсолутната нула (−273.15 °C).
Преку „нано-ограничување“ на водените молекули со помош на синтетизирани мембрани базирани на липиди, истражувачите од ETH Zurich и универзитетот на Цирих успеале водата да ја изладат до -263°C без истата да се замрзне.
За да ги заробат водените молекули, била синтетизирана нова класа на молекули на масти кои се формираат во мек биолошки материјал наречен липидна мезофаза. Во оваа структура, молекулите на мастите се самоорганизираат во екстремно тесна мрежа од меѓусебно поврзани канали, секој со дијаметар помал од 1 нанометар (0.000001 милиметри).
Збиени во тие малечки тунели, водените молекули може да егзистираат во течна форма, но просторот е толку тесен што кристализацијата на мраз е невозможно да се постигне на молекуларно ниво.
Кога кристализацијата не се случува на супер-ниските температури, водата станува „стаклеста“ – таа е во цврста состојба, но не и заледена.
Истражувачите велат дека еден ден мембраните од липидна мезофаза би можеле да им помогнат на научниците да зачувуваат материи базирани на протеини без да ги оштетат, одржувајќи ги во нивната оригинална форма на многу ниски температури.