Тим интернационални истражувачи од универзитетот на Пенсилванија, универзитетот Лехај и од корејскиот институт за наука и технологија, развиле нов вид на супер-лепило инспирирано од слуз од полжави, кое за разлика од обичните лепила може да ја менува состојбата и во нелеплива.
Во секојдневниот живот, користиме лепила или лепливи ленти, меѓутоа при користење на лепила доколку нешто залепиме погрешно, ретко можеме да ја исправиме грешката. Доколку истата грешка се направи со леплива лента, ќе може да се исправи но лентата нема да ја има истата цврстина на лепливата површина како претходно.
Новиот материјал бил инспириран од слузта која ја создаваат полжавите која им овозможува да се лепат на нерамни површини, но и лесно да се одлепат од нив.
Лепливата состојба на гелот кој бил креиран се активира со хидрирање, а како што се суши се зацврснува. Овој ефект е возможен и во спротивна насока – откако нешто е залепено со него, потребно е да се намокри за да се одлепи.
Употребата на ваквиот лепак би била можна при пренесување на тешки објекти (за нивно подигнување и спуштање без оштетување), во производството на компјутерски чипови, при качување на карпи и др.