Ако бевте скептични кога го прочитавте насловот, време е да дознаете дека бесмртноста навистина постои. Станува збор за жив организам, кој не е со микроскопска големина, туку е доволно голем да се види со голо око. Според научниците, Turritopsis nutricula, од класата хидрозои (Hydrozoa), е единствениот организам кој успева да ја измами смртта.
Според досегашните научни сознанија, секое живо суштество е осудено да умре, откако ќе го заврши својот животен циклус.
Хидрозоите претставуваат огромна класа на животни предатори кои најчесто живеат во солени води. Се верува дека потекнуваат од Карипските Острови, но денес се распространети насекаде. Како вид тие се најслични со медузите. Од јајцата и сперматозоидите се формира возрасна медуза, која понатаму се развива во фаза на полип. Кога се во таа фаза, медузите стануваат бесполови.
Сепак, Turritopsis nutricula успева да најде начин да ја победи таа фаза. Она што ги прави единствени овие мали суштества е тоа што откако ќе достигнат сексуална зрелост, тие се враќаат во сексуално незрела, колонијална фаза. Што е уште поизвонредно, додека се млади тие имаат само неколку пипци, а кога ќе ја достигнат зрелата фаза, нивниот број се зголемува на 80-90.
Нивната способност за враќање во фазата на полип се должи на клеточна промена во надворешната страна (Exumbrella), што им дозволува да ја избегнат смртта. Овој процес може да се одвива бесконечно. Колку што успеале да откријат научниците досега, кога ќе се исклучат можните болести или ловење од предатори, оваа клеточна промена ги прави хидрозоите фактички бесмртни.