Група археолози во градот Камиен Поморски, северозападна Полска, пронајдоа нова вампирска гробница.
Се верува дека гробницата датира од 16-тиот век кога во централна Европа владеел стравот од вампири и многумина биле закопувани на специфичен начин, за да не станат од својот гроб.
Во ногата на починатиот е забиен колец, а од устата се извадени горните заби и е ставено парче цигла што јасно укажува на вампирски погреб.
Според верувањата кои биле застапени во периодот од 13-от до 17-от век, луѓето кои биле злобни додека биле живи, можеле да се претворат во вампири после смртта, па затоа биле прободувани со колец во срцето.
Освен тоа постоел обичај да се прободува колец и по другите делови од телото, како и да се вадат забите со цел да се спречи вампирот да ја пие крвта на невините доколку некогаш се врати од мртвите.
Колку и да звучи бизарно, во Полска и во други делови на Европа досега се пронајдени многу луѓе кои што се погребани на овој начин.