Откриени пред повеќе од една декада, инструментите во форма на мал човечки череп и ден денес ги интригираат археолозите.
Таканаречените „Свирчиња на смртта“ се пронајдени во рацете на машки скелет закопан пред храмот посветен на бог Екател лоциран кај археолошкиот локалитет Тлателолко.
Своевремено Ацтеките ги користеле овие минијатурни черепи за време на ритуалите на жртвување со цел душата на оној што умира полесно да премине на другата страна.
Обредот најчесто опфаќал распорување на жртвата, отстранување на срцето и главата и консумирање на месото. Можеби токму затоа звукот кој што го создаваат овие свирчиња со морбиден изглед многу наликува на мачно и страшно врескање.
Уште една од намените за кои што се претпоставува дека се користеле е и заплашувањето на противниците пред започнување на битките.