Група на американски научници деновиве за прв пат го отворија саркофагот на 14-годишно египетско момче, кое е пронајдено во Египет уште во далечните 1920-ти.
Иако мумијата е во прилично добра форма, тимот не може да ја отстрани златната прекривка од лицето на момчето поради страв дека потполно ќе го оштети. Трупот му припаѓа на Минирдис, син на моќен египетски свештеник, кој најверојатно починал пред 2500 години. За сега од него може да се видат само стапалата кои не се прекриени со материјал.
-Најфасцинантниот момент кај сите мумии е тоа што можат да опстанат толку долго. Во суштина тие се мошне кршливи. Секогаш постои голема можност од оштетување и токму затоа избегнуваме да ги отвораме, вели Ј. П. Браун, еден од научниците кои работат на проектот.
Следниот чекор е стабилизација на мумијата за да може да биде пренесена во Лос Анџелес каде што следниот септември ќе биде дел од изложбата „Mummies: Images of the Afterlife “.