Американските научници се обидуваат да изнајдат нов начин за тестирање на медицинските третмани без употреба на животни. За оваа потреба тие создаваат минијатурно човечко тело од функционални органи поставени на серија пластични чипови поврзани еден со друг.
Тимот од Министерството за одбрана и Националниот институт за здравство на САД се надева дека ќе создаде таканаречено „тело на чип“ кое ќе го имитира начинот на кој функционира вистинското човечко тело. Досега се создадени бели дробови, бубрези, црева, црн дроб, како и коскена срцевина на чип која се користи за да се истражат ефектите од радијацијата.
Тродимензионалните ткива се одгледуваат во слоеви во пластични чипови кои се со големина од компјутерски мемориски стик. Секој чип содржи мали канали кои ја имитираат структурата на органот и се пополнети со човечки клетки. Хранливите материи се обезбедени од крвта која тече низ каналите.
-Идејата е да се заменат експериментите врз животни со микро уреди пополнети со човечки клетки и функционални како органи, вели биоинженерот Доналд Ингбер.
Чип органите го добија име „Homo chippiens“ и наскоро ќе бидат поврзани во еден целина за да се открие дали можат да функционираат како мини тело.