Докажано е дека чоколадото го намалува ризикот од мозочен удар, го поттикнува расположението и е одлична храна за мозокот, создава чувство на будност и ја зголемува концентрацијата. Антиоксидансите кои ги содржи, добро влијаат на помнењето.
Емануел Охене Афоаква, професор по прехранбени науки и технологии на универзитетот во Гана, заедно со неговиот тим, откриле нова постапка за производство на чоколадо кое е поздраво и содржи повеќе антиоксиданси.
Имено, антиоксидансите кои ги содржи чоколадото се добри за кардиоваскуларниот систем, како и за помнењето. Афокава и неговиот тим покажале дека складирањето и процесот на пржење можат да резултираат во чоколадо кое содржи повеќе здрави соединенија, а при тоа го задржува слаткиот и убав вкус.
Трикот е да се интервенира во еден од бројните чекори кои му претходат на претворањето на какао во чоколадо. За време на вообичаениот процес на правење на чоколадо, плодовите на какото се берат од стеблата, а потоа се издвојува чистото какао, кое ферментира и се пржи. Но, при процесот на пржење, многу од полифенолите, односно антиоксидансите од какаото, се губат.
Со цел тие да се заштитат и задржат, научниците експериментирале со процесот на пржење, со оглед на фактот што токму тогаш се губи поголемиот дел од антиоксидансите. Обично зрната се пржат 10 до 20 минути на температура од околу 130 степени целзиусови, па научниците одлучиле пржењето да се забави, односно продолжи на 45 минути, но на намалена температура од 116 степени Целзиусови. Пониската температура и подолгиот процес на пржење резултирал со поголема количина на антиоксиданси во финалното чоколадо.
