Да и тоа е можно! Студентите од Универзитетот за инженеринг и технологија од Лима (UTEC) го решија проблемот со загадените води со кој што се соочува фармерскиот регион Бујама.
Фармерите не се во можност да одгледуваат здрав зеленчук бидејќи водата од реката што ја користат за наводнување е контаминирана со тешки метали. Затоа студентите создадоа специјални билборди што ја собираат водата од воздухот
„Air Orchard“ е направа што e опремена со 10 апарати за овлажнување кои ја филтрираат водата од воздухот во систем за наводнување капка по капка што е поврзан со мини фарма сместена веднаш под самиот билборд. За само недела дена преку овој систем се произведени 2448 парчиња здрава зелена салата.
-Направата има неколку филтри што ја прочистуваат водата и ја одржуваат чиста. Па, во зависност од потребата добиената вода може да се користи за пиење или за земјоделски потреби, вели Игнацио Монтеро директор на одделот за бизнис иновација при (UTEC).
Билбордите може да бидат мошне корисни за добивање на чиста вода, но само во средини каде што загаденоста на воздухот не е на алармантно ниво.