Штетата која ја предизвикува човештвото со глобалното затоплување преку испуштањето на сè поголеми количини јаглерод диоксид во атмосферата не може да се поправи, а научно е докажан фактот дека нивото на светските океани од година во година сè повеќе се зголемува.
Научниците се согласуваат дека со ова темпо до крајот на овој век, нивото на морињата ќе се подигне најмалку за метар и половина. Колку вода содржи ледот кој се наоѓа на копното, најдобро е прикажано на мапата направена од National Geographic. Имено, научниците пресметале дека ако дојде до топење на ледот од планетата, нивото на морето ќе се подигне за неверојатни 66 метри!
На Земјата се наоѓаат вкупно 21 милион кубен километар лед, а ако човештвото продолжи да ослободува јаглерод диоксид, ќе бидат потребни околу 5.000 години сè да се потопи. Сепак, научниците предупредуваат дека дури и зголеменото ниво од неколку метри предизвикува огромна и непоправлива штета.
Ако создадеме услови на планетата да нема лед, просечната температура на Земјата ќе изнесува 27°С, наместо сегашните 15°С.
Во тој случај, големите површини на Централна Америка, појасот на Мексиканскиот залив, Карибите и Калифорнија ќе се потопат. Северните делови на Канада и Флорида нема да постојат. Крајбрежјето на Јужна Америка ќе се наоѓа на дното на океаните, а тековите на големите реки ќе се излеат во околното земјиште.
Африка ќе претрпи најмала промена со релативно мали потопени површини, претежно на запад. Европа каква што сега ја знаеме, нема да постои.
Шведска, Финска, Данска, Балтичките држави, северна Германија и Полска, Холандија, Белгија и источниот дел на Велика Британија, западното крајбрежје на Франција, северна Италија, голем дел на Романија, јужна Украина и Крим, ќе бидат поплавени.
Морето ќе ги проголта и Санкт Петербург, Стокхолм, Копенхаген, Лондон, Хамбург, Амстердам, Хелсинки, Истанбул, Венеција, Одеса, Брисел, Барселона и многу други градови со илјада години стара историја и култура.
И во Азија последиците ќе бидат катастрофални. Источните делови на Индија, Бангладеш, југоисточна Азија, Филипинскиот архипелаг, источното крајбрежје на Кина со Шангај и Пекинг ќе станат дел од водите на Индискиот и Тихиот океан.
Површински, Австралија нема да изгуби многу, но доволно е да знаеме дека ќе исчезне прикрајбрежниот појас на кој моментално живеат четири од пет жители на тој континент. За Антарктикот е излишно да зборуваме – ќе изгуби повеќе од половина површина.
