Американската компанија BioCarbon Engineering истакна дека има во план да засади до 1 милијарда дрва на годишно ниво користејќи ги придобивките на дрон технологијата. BioCarbon го покренува проектот со цел да се справи со масовното уништување на шумите кое се случува насекаде низ светот.
Тимот на НАСА инженерот Лаурен Флечер го анализирал проблемот со сечењето на дрвјата и дошол до заклучок дека луѓето нема да можат да се справат со истиот освен ако не ја вклучат технологијата.
-Деструкцијата на шумите на глобално ниво поради рударството, земјоделството и урбаната експанзија уништува 26 милијарди дрва секоја година. Веруваме дека најдобриот начин за решавање на индустриската деструкција е со помош на најновите автоматизирани технологии, вели Флечер.
Според прогнозите Земјата ќе остане без дрва доколку не се изнајде подобро решение за пошумување кое ќе го замени рачниот начин на кој што моментално се изведува процесот.
Тимот на Флечер планира да користи дронови над посебно одбележани области каде ќе бидат испуштани биоразградливи пластични садови исполнети со изртени семиња и плодна почва.
Откако ќе бидат спуштени во земјата семињата ќе бидат наводнувани и мониторирани од страна на дроновите кои потоа ќе го снабдуваат тимот со информации за состојбата и напредокот на дрвата.
Во план е да се засадуваат по 36 илјади дрвја на ден што ќе чини околу 15 проценти од цената на традиционалните методи за пошумување.