Дали по веста за тоа дека на Марс е пронајдена вода, Американската вселенска агенција подготвува да објави уште една спектакуларна вест овој пат поврзана со Плутон?
Водачот на „Нови хоризонти“ мисијата што го истражува Плутон, Алан Стерн, ги подгреа гласините откако за време на едно од своите предавања изјави дека „светот живее“ и дека „2015-та ќе биде година запишана во учебниците “.
-НАСА сè уште не ми дозволува да ви откријам што ќе ви кажеме во четврток. Сепак, тоа е нешто неверојатно, изјави Стерн. Тоа беше сосема доволно за да започнат најразлични типови на шпекулации од тоа дека и на Плутон има вода до тоа дека се пронајдени некакви облици на живот.
Во меѓувреме на официјалниот Twitter профил на НАСА излезе информација дека станува збор за лажна гласина, односно дека деновиве нема да има никакво важно соопштение поврзано со Плутон. Сепак, агенцијата не негираше дека научниците откриле нешто необично на планетата.
„Нови хоризонти“ мисијата на НАСА имаше задача да ја набљудува и проучува џуџестата планета и нејзините сателити со помош на сонда која прелета покрај Плутон во средината на јули годинава.
За сега се симнати само 10 проценти од податоците на „Нови хоризонти“ леталото, што значи дека многу нешта допрва ќе се дознаат откако ќе бидат добиени сите фотографии што ги направи леталото за време на својата мисија.