Валентина Терешкова е првата жена која полетала во Вселената, а од тоа патување на 16 јуни 1963 година за малку и немала никогаш да се врати. Терешкова била избрана за мисијата пред сè поради огромното искуство во скокање со падобран, што на крајот на мисијата се покажало како клучно за враќање дома.
До моментот кога била лансирана со бродот Vostok 6, таа поминала 126 скокови, што било мошне важно поради фактот дека руските астронаути при враќањето на Земјата скокале од вселенскиот брод и се приземјувале на земјата со помош на падобран. Терешкова со уште четири жени се подготвувале цели 18 месеци, но само таа успеала да замине на патувањето. Во повеќе од 70 часа, ја обиколила земјата дури 48 пати.
Единствена работа која заборавиле да и спакуваат била четка за заби, за која се шалеле дека е огромен пропуст, а таа кажала дека се снашла и без тоа со оглед дека имала раце, вода и паста за заби. Но, пред крајот на патувањето забележала дека се појавиле многу грешки – нејзиниот брод почнал да се оддалечува од Земјата наместо да се приближува.
- Недостатокот на четкичката за заби беше шала во споредба со грешката при програмирањето. Имено, бродот беше програмиран за нагорно, а не надолно возење. Почнав сè повеќе да се искачувам, наместо да се спуштам кон тлото. Успеав на време да се јавам на контролорите на Земјата, за да им кажам што се случува, споделила Терешкова.
Сепак, во 60-те години во Советскиот Сојуз, грешките на вработените во владата не им се опростувале лесно, а особено не на оние кои работеле во руската вселенска програма, која во тоа време се натпреварувала со Американците. Дизајнерот на бродот, Сергеј Королејв, побарал од Терешкова, да не зборува на никој за овој проблем, барем неколку децении.
- Потоа побарав личноста која е одговорна за грешката да не биде казнета, бидејќи знаев дека казната ќе биде строга. Таа случка ја чував како тајна цели 30 години.
Поради личната безбедност Терешкова морала да скока со падобран на висина поголема од 6.000 метри и слетала близу границата со Казахстан, Монголија и Кина. Нејзината мисија била 12-та во човечката историја, а таа била првата жена. Америка дури по 20 години ја пратила првата Американка во Вселената.