На интернационалниот автомобилски саем во Детроит, германскиот производител на возила Audi го претстави својот лунарен ровер (со погон на сите 4 тркала) наречен Audi Lunar Quattro.
Целиот проект е дел од Google Lunar XPrize иницијативата започната уште во 2007-ма, чија цел е да се поттикнат компаниите и претприемачите да креираат (прифатливи) можности за пристап на Месечината и подалеку. Како дополнителна мотивација е и наградата од 30 милиони долари за оној што ќе успее да однесе робот на Месечината кој ќе биде способен да помине барем 500 метри на нејзината површина.
Part Time Scientists (интернационален тим со над 70 членови од 3 континента) во партнерство со Audi, го создале овој ровер (скоро целосно изработен од алуминиум и титаниум) исклучиво со 3D принтање. Тоа им овозможило, иако некои негови делови се со дебелина од само 1мм, да низ нивната шуплива структура и специјални канали го изведат/протнат ожичувањето – нешто што би било невозможно доколку деловите биле изработувани со стандардниот CNC (Computer Numerical Control ) процес.
Тимот зад овој ровер сака да креира и 3D принтер кој може да ја користи почвата од Месечината (која е полна со алуминиум, титаниум и магнезиум) за да изработува делови за него (но и за други уреди), на самата Месечина.
Audi Lunar Quattro е дел од 16-те натпреварувачи во овој натпревар на Google, а се предвидува да биде спремен за испраќање на Месечината уште во 2017-та год.