На денешен ден пред 15 години, американскиот мултимилионер Денис Тито полетал кон Вселената со руското летало Сојуз. Во орбитата поминал седум дена, а за тоа задоволство платил 20 милиони долари.
Денис е поранешен инженер во НАСА, кој тогаш имал 61 година и имал желба да ја посети Меѓународната вселенска станица. Тоа му било сон, па кога се збогатил, одлучил и тоа да го направи. Во 1972 година во Калифорнија основал своја фирма за инвестициски менаџмент од која ги заработил милионите.
Сепак и покрај тоа што работел во НАСА, од таму не му одобриле патување, па морал да се обрати во Руската вселенска агенција. Постоела загриженост дека не е доволно квалификуван за да им се придружи на професионалните астронаути во Вселената, но откако уплатил 20 милиони долари, Русите му дозволиле. Поминал тест за физичка способност и основна обука заедно со екипажот, кој се состоел од двајца руски астронаути. Тито ја искористил посетата за неколку научни експерименти, за кои сметал дека ќе му бидат корисни во неговата компанија.