Компанијата Oxford's Reaction Engines Ltd (REL) објавила дека добила договор со ESA (European Space Agency) вреден 10 милиони евра за развивање на револуционерен авионски мотор наречен SABRE (Synergistic Air-Breathing Rocket Engine), со технологија која ќе може да функционира на летала кои ќе летаат над земјата, но и во вселената.
Овој договор ја финализира претходната обврска на владата на UK да инвестира 60 милиони фунти во SABRE.
Најновите фондови (меѓу кои дел се добиени и од одбрамбената компанија BAE Systems и од Американските воздухопловни сили) ќе овозможат REL да ги започне копнените тестови на овој мотор, со што ќе биде потребно прво да докаже дека SABRE функционира, за потоа да го вгради во сопствен авион наречен Skylon. Skylon ќе може да полетува и слетува на авионска писта и да носи товар или човечки екипаж во орбитата на земјата. SABRE моторот на Skylon ќе му овозможува да функционира и како „обичен“ авион во воздухот, но и како ракета во вселената.
Клучната одлика на SABRE е тоа што не треба со себе да носи кислород наменет за комората за согорување – наместо тоа, тој го користи атмосферскиот кислород, со што значително се намалува количеството на гориво кое авионот треба да го носи. Еден од поголемите проблеми бил да се надминат проблемите со замрзнување поради атмосферскиот кислород, кој бил решен со користење на метанолски инјекции кои функционираат како антифриз.