Руската војска изјавила дека е во процес на создавање на вселенски авион кој би можел да испукува оружја било каде на Земјината топка во рок од два часа, и дека ќе биде вооружен со нуклеарки.
За сајтот Sputnik (кој е контролиран од власта и е единствен извор на оваа вест) тие изјавиле дека бомбардерот се очекува да биде спремен до 2020-та година. Тој би бил сличен на американскиот Boeing X-37 (X-37B), кој е роботски мини-шатл, еден вид на минијатурна, далечински управувана верзија на Интернационалната Вселенска Станица.
Идејата е овој бомбардер да полетува од обична авионска писта и да го патролира рускиот воздушен простор. Доколку му е дадена команда, тој може да полета во Вселената, да ја нападне целта со нуклеарна ракета и повторно да се врати на земјата.
Такво нешто не само што би претставувало грубо кршење на интернационалното право, туку би било и екстремно хипокритично од страна на Русија бидејќи тие ја имаат обвинето американската влада за вооружување на вселенско летало (гореспоменатиот X-37B, при првиот негов лет), кој инаку е способен да биде вооружен, но таа опција никогаш не била искористена бидејќи е премалечок за носење на толку моќни оружја. Руската војска тогаш тврдела дека тоа било прекршување на Вселенскиот договор кој бил потпишан во 1967-ма од 104 земји (вклучувајќи ги САД и Русија), и со кој што се забранува милитаризација на Вселената.
Моторот кој би се вградувал во бомбардеров би бил сличен на SABRE моторот (развиен во САД), кој покрај течно гориво кое согорува, е способен да го користи и кислородот од воздухот за да ги постигне суперсоничните брзини. Според Sputnik, можно е моторот да биде претставен на Army 2016 – интернационалниот форум за воена технологија кој се одржува близу Москва, во септември.