Мистериозен неидентификуван објект до Нептун

Научниците откриле мистериозен објект на работ на Сончевиот систем за кој што не се знае премногу, а и тоа што се знае нема некоја смисла.

Наречен Niku, се наоѓа во близина на Нептун и е еден вид на малечка планета, но она што е чудно е што не се однесува како останатите планети од тој тип. Како прво, Niku орбитира околу Сонцето навалена за 110 степени во однос на рамнината на Сончевиот систем, т.е рамниот орбитален диск во кој планетите се движат околу Сонцето. Второ, скоро сите објекти во нашиот Сончев систем орбитираат во иста насока, наречена проградна, но Niku има ретроградна орбита, што значи се движи во спротивна насока од нив.

За откритието на Niku се заслужни интернационалниот тим научници од Pan-STARRS (Panoramic Survey Telescope and Rapid Response System) во Maui, Hawaii.

Објектот е слабо видлив бидејќи е 160 000 пати помалку светол од Нептун, што сугерира дека големината му е нешто помалку од 200km во дијаметар.

Како причина за чудната орбита и наваленост на Niku, научниците претпоставуваат дека објектот најверојатно имал колизија со нешто или бил повлечен од курсот од некој друг гравитациски извор, а можно е и да е дел од група на објекти кои сите се движат во невообичаени позиции во однос на рамнината на Сончевиот систем. Ваква група се споменува и во хипотезата за Деветтата Планета, која се претпоставува (но не е потврдено) дека е масивна планета на работ на Сончевиот систем кој орбитира околу Сонцето еднаш секои 10 000 до 20 000 години.