OSIRIS-Rex е името на сателитот и на една од најамбициозните мисии на NASA – тој ќе има рандеву со астероид, ќе треба да собере парче од неговата површина и со него да се врати назад на Земјата.
Астероидот во прашање е наречен 101955 Bennu и е широк половина километар, со потекло (најверојатно) од астероидниот појас помеѓу Марс и Јупитер.
Во 2135-та год, Benny ќе помине на 300 000 km оддалеченост од нашата планета, а постои можност и да се удри во неа при крајот на 22-риот век.
OSIRIS (акроним од The Origins, Spectral Interpretation, Resource Identification, Security-Regolith Explorer) го започнa патувањето на 8-ми септември и ќе му требаат две години додека се доближи до Bennu.
Кога тоа ќе го направи, ќе помине уште две години во неговата орбита, ќе го мапира и студира, меѓу другото и со цел да се пронајде адекватна локација од која што би се земал примерок. Во 2020, OSIRIS конечно ќе го изведе маневарот со издолжената „рака“ кој треба да трае 5 секунди, за да земе парче примерок од астероидот.
Враќањето назад на земјата ќе трае уште околу 2 и пол години, а се планира да слета во пустината Јута, по што материјалот од Bennu ќе биде превземен и истражуван од NASA, како еден вид на фосил од најраната историја и зачетокот на сончевиот систем.