Астрономи со помош на Hubble Space Telescope-от на NASA пронашле докази за гејзери од водена пареа високи по 200km, кои избиваат од површината на Европа, сателитот на Јупитер.
Веќе е добро познато дека океаните на Европа содржат двапати повеќе вода отколку оние на Земјата, што го прави овој сателит екстремно погоден за истражување во потрага по вонземски живот. Меѓутоа, досега било невозможно да се земат примероци од таа вода бидејќи океаните на Европа се заштитени со слој од екстремно студен и цврст мраз со непозната дебелина.
Според ова последно откритие на NASA, се зголемува можноста астронаутите кои некогаш би патувале до Европа да можат да соберат примероци од неговите океани, без да треба да дупчат низ километри мраз.
До ова откритие се дошло така што биле снимани слики од Европа во ултравиолетова светлина, во моментот кога сателитот транзитирал преку дискот на Јупитер. Анализата на сликите покажала дека над површината на Европа има силуети од гејзери, кои се појавувале во 10 различни наврати во период од 15 месеци.
Со цел да го потврдат присуството на водата во овие гејзери од пареа, научниците предложиле да се искористи инфрацрвената визија на James Webb Space Telescope-от на NASA, кој треба да биде лансиран во 2018-та год.
NASA исто така планира и мисија кон сателитот на Јупитер, со товар кој ќе треба да го потврди сето ова и кој ќе им овозможи студирање на овој феномен преку прелети блиски до неговата површина.