Една од причините за кои научниците се заинатени што поскоро да стигнат до Марс е за да може да испитаат дали постојат докази за живот кој постоел или сè уште постои на планетата. Сега, едно ново откритие покажува дека има структури на Марс кои можеби ги имаат идеалните услови за живот.
Нова студија водена од научници од Универзитетот од Тексас ги истражувала вдлабнатините во кратерите околу регионите Hellas Planitia и Galaxias Fossae, кои за првпат биле откриени во 2009 и уште од тогаш ги заинтересирале истражувачите бидејќи многу потсетувале на структури кои се наоѓаат на Земјата, наречени „казани со мраз“. Тие обично се наоѓаат во Исланд или Гренланд, и се формираат кога слоевите мраз се топат од вулкански ерупции, поради што се појавуваат концентрични пукнатини.
Откога истражувачите ги анализирале структурите на Марс користејќи стереоскопски фотографии кои од 2D слики можат да извадат 3D информации, заклучиле дека формацијата во Galaxias Fossae е најверојатно создадена од удар од астероид, додека онаа на Hellas би можела да е создадена со вулканска ерупција, слично како формациите на Земјата.
Доколку истражувачите се во право, нивното откритие би значело дека вдлабнатината Hellas би била одлична почетна локација да се бара живот на Mars кога NASA ќе испрати нов ровер на планетата во 2020-та. Големото количество магма потребно за да се истопи ледот за да се креира една таква структура би оставило зад себе течна вода, која би можела да содржи живи организми.