Еден од најголемите предизвици со кои што се соочуваме во 21-виот век е проблемот со енергијата – како да се генерира доволна количина, како да се произведе што поевтино со што помалку несакани ефекти и како да се донесе до корисниците.
Едно од решенијата е она понудено од SSPI (Space Solar Power Initiative / иницијатива за вселенска соларна енергија), партнерство помеѓу Calthech и Northrup Grumman.
Идејата соларната енергија од Вселената да се испраќа кон Земјата е едноставна и може да функционира – од SSPI имаат обмислено модуларен пристап со кој би било можно да се оствари ниската цена за изработка. Основната единица е „мултифункционална плочка“, т.е лесен фотоволтаичен сегмент со димензии 10x10cm, дебелина од 3cm и тежина од 0.8g, кој може да биде сплескан кога се пакува за лансирање.
400 од овие плочки потоа се составуваат во панели – 900 панели на еден сателит. Секој од овие сателити исто така може да се превитка за да зафаќа мал простор при лансирањето, и потоа да си ја поврати нормалната големина штом се најде во орбитата, при што таа би изнесувала околу две третини од фудбалско игралиште.
Концептот вклучува 2500 вакви сателити кои би летале во блиска формација, формирајќи површина од соларни панели од 9 квадратни километри, со секоја плочка способна да конвертира соларна енергија во радио енергија, која би се испраќала кон Земјата.
Убавината на овој систем е тоа што нема потреба од скапи енергетски инфраструктури на Земјата, што значи дека разни региони кои се далечни или неразвиени лесно би можеле да бидат обезбедени со соларна енергија од вселената, бидејќи за нејзино примање би биле потребни едноставни антени и станици.
Во меѓувреме, лесните плочки кои би биле евтини за производство би биле многу попрактични во случај на оштетување од микрометеорити или некој вселенски отпад, бидејќи би се оштетиле неколку од нив а сè останато би функционирало – во споредба со катастрофалните последици кои едно вакво оштетување би ги имало на еден целосен вселенски објект.
Во секој случај, се работи за интригантен концепт во кој што дефинитивно вреди да се инвестира – со доволно интересирање и мобилизирање на електронската индустрија да се изработат овие плочки, како и на приватните вселенски компании да ги транспортираат во вселената, оваа технологија може да биде иднината на енергијата.