Астрономите Стјуарт Лов и Крис Норт создале интерактивна вебсајт апликација преку која што се пресметува колку високо би скокале на разни небесни тела, што се должи на разните гравитациски полиња на секое од нив.
На пример, височината на обичен скок на Земјата е околу половина метар и трае 1 секунда.
1) Гравитацијата на површината на Месечината изнесува 17% од онаа на Земјата, па така доколку таму скокнете со иста силина како на нашата планета, би можеле да достигнете височина од околу 3 метри и во воздухот да останете 4 секунди.
2) Марс е поголем од Месечината, но помал од Земјата и има една третина од нејзината гравитација и таму скокот би изнесувал 1 метар, со времетраење од 2 секунди.
3) Плутон има гравитација која изнесува 6% од онаа на Земјата, па скокот таму ќе ве однесе 7.6 метри високо, а во тој поглед ќе може да уживате 9 до 10 секунди
4) Енцелад, една од месечините на Сатурн, под замрзнатата кора крие цел океан од течна вода, која преку гејзери ја исфрла во Вселената, а неговиот дијаметар е 14% од дијаметарот на нашата Месечина. Скокањето тука би било многу забавно, бидејќи височината на скокот би изнесувала 42.6 метри, а патот до горе и назад би траел цела минута.
5) Кометата 67P, “гробницата“ на сондата Филае од мисијата Розета, има толку слаба гравитација да доколку таму скокнете, ќе продлжите да лебдите во празнината на вселената.
Инаку, името на апликацијата е High Jump.