Амбициозниот „Телескоп за набљудување на хоризонтот на случувањата“ (Event Horizon Telescope) е подготвен за работа и за само неколку месеци интернационална група од астрономи може да добие досега најдетална слика од една црна дупка.
Неговатa цел ќе биде Sagittarius A*, супермасивна црна дупка во центарот на Млечниот Пат, а таа ќе се постигне преку поврзување на 9 радио телескопи ширум планетата кои ќе функционираат како еден.
Тимот истражувачи се надева дека ќе има успешно опсервирање во периодот помеѓу 5 и 14 април, кога ќе има директен поглед на работ на црната дупка. Бидејќи дури и светлината не може да им избега, црните дупки не можат да се видат директно, па така телескопот ќе гледа во т.н. „хоризонт на случувањата“ – регионот кој ја двои црната дупка од остатокот на универзумот.
Гасови и ѕвезден материјал орбитираат околу дупките пред да бидат вшмукани во нив, а радио брановите овозможуваат тој гас да се види, а со помош на процесот наречен интерферометрија и да се фотографира во слика со што поголема резолуција, која ќе биде составена од комбинација на податоците добиени од различните радио телескопи лоцирани во САД, Чиле, Шпанија и Северниот пол.
Таква резолуција е и неопходна доколку сакаме да ја видиме Sagittarius A*, бидејќи иако тежи колку 4 милиони сонца, таа има дијаметар од „само“ 44 милиони километри. Фактот што се наоѓа на 26 000 светлосни години од нас, нејзината големина на небото е еднаква на едно CD на површината на Месечината, гледано од Земјата.