Воздухопловниот претприемач Робет Бигелоу смета дека приватни вселенски станици може да орбитираат околу Месечината до 2020-та год.
Тој е шеф на Bigelow Aerospace компанијата која досега има лансирано три приватни прототипи на вселенски живеалишта на надувување во орбитата на Земјата. Најскорашен нивни проект е BEAM (Bigelow Expandable Activity Module), кој на Интернационалната Вселенска Станица бил испорачан во 2016 преку SpaceX Dragon товарното летало. BEAM е првата „соба“ на надувување инсталирана на вселенската станица, креирана како дел од тестот на NASA за идни вселенски живеалишта, а досегашните извештаи велат дека функционира добро.
Вселенскиот туризам е моментално „жешка“ тема за Бигелоу и останатите вселенски претприемачи – на 26-ти февруари, Елон Маск најави дека неговата SpaceX компанија ќе лансира приватен лет околу Месечината во 2018, за кој двајцата сега засега тајни патници веќе имаат уплатено аванс. Џеф Безос, пак, кој е сопственик на приватната вселенска компанија Blue Origin, исто така има објавено планови за пат кон Месечината.
Бигелоу се надева дека огромните вселенски живеалишта на надувување кои ќе функционираат и како приватни вселенски станици ќе чинат само дел од цената која NASA би ја нудела за истото, и дека неговата, но и останатите компании кои ќе овозможуваат поевтини и попристапни вселенски летови ќе му овозможат на човештвото поскоро да се прошири и вон нашата планета, можеби еден ден посетувајќи или колонизирајќи други планети.